Бахрейнде жезөкшелікпен айналысуға мәжбүр болған 21 отандасымыз секс-құлдықтан құтқарылды, деп хабарлайды Neonomad.kz ақпарат агенттігі КТК арнасына сілтеме жасап. Жас қыздар жат елге қонақ үйлерде күтуші боламыз деп барған екен.
Алайда арамзалардың арбауына түсіп қалған. Онда шақырғандар қыздардың құжатын тартып алып, жезөкшелікке жегіпті. Ал талапқа көнбегендерін ұрып-соққан. Алайда Бахрейн полициясы мен еліміздің сыртқы істер министрлігі отандастарымызды секс-құлдықтан құтқарып алды. Ал оларды жеңіл жүріске итермелегендер ұсталған. Күдіктілер қатарында Қазақстан азаматтары да бар көрінеді. Қазір олар тергеліп жатыр. Ал жат елде жәбір көрген 21 азаматша алдағы уақытта елге жеткізіледі.